【报道于 15:20 更新】
【Yahoo 新闻报道】保安局局长邓炳强不时到电台接受访问，多以时事节目为主，今早（22 日）首次接受港台消闲节目《疯 Show 快活人》访问。邓炳强话「通常嚟亲（电台）都係时事节目」，所以今次好兴奋。主持人梁继璋、李丽蕊、马小强不停问局长平时生活习惯同嗜好，邓炳强滔滔不绝分享，包括讲起今年新买嘅狗仔 Lulu ，另外仲透露今年年初立法（政府就《基本法》第 23 条立法）好忙碌，令到佢无时间跑步，而家体重创「历史高位」！
在 2021 年被撤换的前节目主持曾志豪则在社交网站上指，当年被告知做这个娱乐消闲节目不应讲政治，如今节目却邀请官员分享养狗、体重等话题。他感叹道：「折堕」、「好彩走咗」。
称今年购比熊犬
邓炳强今年 3 月喺 facebook 分享屋企新成员 Lulu，自此成为爱犬之人，经常喺社交媒体分享 Lulu 靓相。佢喺《疯 Show 快活人》透露，因为上年女儿结婚，「同夫人要搵啲嘢嚟照顾吓」，话 Lulu 呢只迷你版比熊「好得意」，「好似细路仔」，每次返到屋企佢都会即刻跑过来转圈，感受到好开心。邓炳强仲话，遇到 Lulu 呢个故事係「传奇」，本来佢同太太喺宠物店见到 Lulu 觉得好得意，但係已被另一位顾客买咗。之后佢同太太去其他地方睇过都搵唔啱，于是再去返本身间宠物店，点知竟然遇返 Lulu！店员透露原来前主人接 Lulu 返屋企唔习惯，所以送返宠物店，邓炳强同太太于是即刻将 Lulu 带返屋企，「缘份就係咁嚟喇」。
主持人仲问局长平时饮食喜好，邓炳强话佢锺意食「香口嘢」，尤其是东南亚菜、茶餐厅。佢仲大爆而家体重属于「历史高位」，因为年初立法时期比较忙碌，佢以往晚晚跑步，但当时忙到无时间跑机，佢话：「为咗继续食嘢，都係要重拾跑步！」主持人亦都好关心佢声音沙哑问题，局长就话呢个问题都好多年，讲嘢多而且睡眠不足就会声沙，要去到周末先有机会瞓到 6 个钟。
幻想似刘德华做保安局局长
邓炳强在中大社工系毕业之后投考警察，一路晋升至警务处处长，之后再加入政府成为保安局局长。曾经喺《开心鬼》做过临时演员嘅邓炳强，又喺节目分享自己锺意睇警匪片，包括李修贤套《公僕》、「成龙大哥作品睇过超过十次」、仲有《无间道》、《拆弹专家》、《怒火》、《十万火急》、《救火英雄》、《海关战线》等，话自己每当情绪低落时都会翻睇！讲起近年本港警匪片，不得不提《寒战》，邓炳强话睇戏时「幻想自己好似刘德华咁，做到保安局局长就好啦，最后梦想成真！」
邓炳强亦分享自己好锺意听经典歌曲，包括《猎鹰》主题曲《胸怀大志》、仲有《谁能明白我》、《真的汉子》、《中国人》，觉得呢类型歌曲好慷慨激昂，带来正能量。佢仲透露自己因为睇咗《猎鹰》，激发到佢想做警察，同刘德华一样都係读完大学之后考帮办（督察）。佢喺节目尾声点咗《胸怀大志》送俾一众纪律部队执法人员同佢哋家人，希望鼓励大家士气，呼吁大家紧守岗位，另外家人可以继续支持佢哋。
节目主持 2021 年被撤换
《疯 Show 快活人》是港台长寿节目，由 1992 年播出至今，历届经典主持人包括梁继璋与贵花田（陈宝玲）、梁思浩组成的三人组合。在 2021 年，当时主持节目的曾志豪及贵花田突然遭到解僱。其中曾志豪多年在港台电视节目《头条新闻》饰演「小豪子」一角，经常幽默讽刺政府施政。
在本报道刊出后，曾志豪在社交网站转发，并感叹道：「折堕」、「好彩走咗」。他指当年任职该节目主持时，经常被告知是娱乐消闲节目，不应讲政治，「依家好啰，可以讲政治，仲可以请呢D官员上黎，但原来係讲佢养狗同护声心得同关心佢立 23 条体重超标⋯⋯」
曾志豪又形容节目变成灾难，「有少少唏嘘，个 D 都係讲得出名既前辈 DJ，都曾经佔有一席位，结果临尾香，晚节不保，做得咁核突，竟然沦落到要同邓炳强倾护声心得、饮食喜好。」
发表评论