Grand住去大阪｜陆浩明被C君当众施压催婚娶拍拖12年女友：拖咗人咁多年

陆浩明（6号）与女友陈诗欣（Ayan）拍拖12年，爱得高调，不时喺社交平台上公开放闪，又借节日及对方生日去旅行，同时互相製造惊喜，唔少网民都希望佢哋快啲结婚，网民同身边嘅人认定佢哋打风都打唔甩，就连肥妈（Maria Cordero）都一早嗌Ayan做「新抱仔」。近日，6号与C君、高海宁（高 Ling）合作主持旅游节目《Grand住去大阪》，C君乘机向6号施压催婚。

由C君、高海宁及6号主持嘅《Grand住去大阪》于16日首播，三人于一连三集节目中，大歎米芝莲餐厅兼全世界最贵寿司、豪花数万日元享受顶级spa，亦会每晚入住大阪唔同嘅天花板酒店。于首集节目中，佢哋就去到大阪一间以大人游乐场为主题嘅酒店，以及去到米芝莲一星餐厅和吞拿鱼极致餐厅等。

最后，三人去到大阪必到地标兼拍拖胜地：梅田蓝天大厦空中庭园，喺360度全方位观景台欣赏大阪夜景，又到室内餐厅歎美酒，C君见嗰到喺求婚胜地，乘机向6号施压催婚：「点解你对求婚少少诚意都冇？拖咗人咁多年唔肯娶人呢？完全冇婚姻概念。」6号表现无奈，表示C君比自己母亲更加啰嗦：「到时我第一个通知你，你唔好烦我啦！」

即使6号与Ayan年龄相差14年，但无阻感情，曾于TVB节目《1+1幸福》大方分享相识经过，6号指二人相识于朋友聚会，Ayan首先吸引佢嘅唔係外表，而係好似卡通公仔嘅声线，与佢自拍后乘机借SD相而交换电话并展开追求；而Ayan就觉得6号比自己高和声音动听，与理想男友条件符合，于是接受咗6号。