邓炳强曾幻想如《寒战》刘德华任局长 终梦想成真｜Ray Online

保安局局长邓炳强曾经多次透露当年因为刘德华主演嘅电视剧《猎鹰》立志投身警队。睇嚟佢对刘德华情有独锺，原来佢仲曾经幻想好似刘德华喺电影《寒战》入面嘅角色咁担任保安局局长，终于就梦想成真啦！

邓炳强今日接受香港电台消闲节目「疯Show快活人」访问，话就算平时工作好忙碌，都会抽时间同屋企人共度时光，通常会一齐行商场、睇戏等等。邓炳强就算睇戏都锺意睇警匪片，包括《无间道》、《拆弹专家》、《怒火》等等。唔係睇完一次就算㗎，邓炳强话当情绪低落嗰阵，会翻睇呢啲电影，甚至睇咗十几次。除咗睇戏，邓炳强都锺意听经典歌曲，特别锺意《猎鹰》主题曲《胸怀大志》，仲锺意听林子祥嘅《真的汉子》、刘德华嘅《中国人》等等，因为呢啲歌曲充满激昂嘅正能量，「辛苦完，听完又继续上路」。

其他兴趣方面，邓炳强分享锺意食香口嘅东南亚同埋茶餐厅菜式。更加自爆体重上升到历史高位！因为年初嘅立法工作好忙，放低咗每晚跑步嘅习惯。为咗继续食嘢，都要重拾跑步啦。主持关心邓炳强声沙，佢透露问题困扰多年，平时讲嘢多，如果唔够瞓就更加容易声沙。佢话唔可以减少工作同陪伴屋企人嘅时间，所以好少「Me time」，得周末先有机会瞓6个钟。

邓炳强屋企前排多咗个新成员，就係爱犬「Lulu」，佢话因为个女上年结婚，佢同太太需要搵啲嘢嚟照顾。佢分享当初喺宠物店见到呢只迷你比熊犬已经觉得好得意，「好似细路仔」，点知畀人买走咗，但因为主人接返屋企之后唔习惯，送返去宠物店。邓炳强同太太一个礼拜后喺宠物店重遇「Lulu」，终于带咗返屋企，「缘份就係咁嚟啦」。佢话每日返屋企，「Lulu」都会跑嚟欢迎佢，令佢好开心。

原文刊登于 AM730 https://www.am730.com.hk/本地/邓炳强曾幻想如-寒战-刘德华任局长-终梦想成真-ray-online/509420?utm_source=yahoorss&utm_medium=referral